Os viaxeiros do tren a Barcelona que se viron afectados o domingo por unha avaría volveron este luns a denunciar as malas condicións do servizo. "É un tren do terceiro mundo e non entramos no primeiro mundo ata que chegamos a Zaragoza, ás oito da mañá deste luns", dixo un afectado, que volvía sinalar a indignación que provocou a situación entre todos os viaxeiros que se viron afectados pola avaría.
Os viaxeiros, que tiñan que saír de Lugo sobre as 7.20 horas da tarde do domingo, viaxaron finalmente en autobús e non os recolleron ata as dez e media da noite na estación de Lugo, denunciaron.
Tras subirse ao bus, os viaxeiros foron sometidos a unha "ruta turística" por Sarria, Monforte, Quiroga, A rúa e O Barco de Valdeorras, denunciaron este luns. A viaxe foi unha tortura ata chegar a Zaragoza, relataron. Insistiron en que se compran billetes de tren é para viaxar cómodos, non nun autobús dando a volta ao mundo ata Zaragoza.
Na capital aragonesa, onde xa colleron o Ave para chegar a Barcelona, o trato da compañía cambiou completamente e todo foron atencións aos viaxeiros afectados polo fallo rexistrado en Galicia, relataron.
Indicaron que o ocorrido o domingo non foi algo puntual, xa que se rexistrou en máis ocasións. "A quen temos casas en Lugo ou nos expomos facer rehabilitacións vai deixar de interesarnos ter casas aquí, porque viaxar a Lugo é sempre un problema", dicía este afectado.
"A situación é como para que os cidadáns reaccionen, como ocorreu xa en Estremadura, porque se non se vai seguir maltratando o servizo, ata que logren que o tren deixe de funcionar porque non hai viaxeiros", dicía este luns este afectado.
Os afectados criticaron a acumulación de fallos de Renfe en Lugo e puxeron como exemplo que o domingo tamén se deixou colgados a viaxeiros dun tren á Coruña, que deberon esperar a que chegase un maquinista, detallaron.
Dicían que na estación de Lugo chegouse a producir unha situación esperpéntica, porque todos os viaxeiros que había na terminal esa tarde estaban afectados por algún fallo no servizo, que a compañía non foi capaz nin de prever nin de solucionar nun tempo razoable, aseguraban.
