o aforamento da igrexa de Santiago A Nova quedou curto para acoller aos varios centos de persoas que non se quixeron perder o concerto de Noiteboa, organizado pola asociación Lugo Monumental que preside Luís Latorre, con Noemi Mazoy como cabeza de cartel.
A soprano, que está a triunfar en Barcelona interpretando a unha das protagonistas do musical ‘Sorrisos e bágoas', estivo acompañada polo Orfeón Lucense, baixo a dirección de Marcos Fernández; o violinista Carlos Rodríguez; as pianistas Elena Udina e Conchi Seijas; o trompetista Maxim Khibovski, e os bailaríns de Ritmo Lugo.
O concerto foi benéfico. Os asistentes doaron alimentos para os necesitados. É digno tamén de destacar o altruísmo de Noemi Mazoy, que, desinteresadamente, desprazouse o mesmo martes desde Barcelona, ensaiou, actuou e, tras a cea familiar de Noiteboa, regresou de madrugada á Cidade Condal para cantar na representación de onte.
Lóstregos, fieis á súa cita do Nadal de repartir xoguetes
Quen tampouco faltaron á súa cita do Nadal, e xa van sete edicións, foron os membros do motoclub Lóstregos Lucus, que acompañaron a Papá Noel na repartición de xoguetes a uns 250 nenos da cidade de menos de 11 anos cuxas familias están a pasar por apuros.
Un maratón en bicicleta desde Lugo ata San Cibrao
O grupo de mountain bike Rozasilveiras aproveitou estas datas para realizar unha ruta de 140 quilómetros de Lugo a San Cibrao por zonas montañosas.
