Os concesionarios lucenses están a tirar a casa pola fiestra en SalonAuto. Neste certame, que durará ata este domingo, pódense adquirir turismos novos a prezos de quilómetro cero. Os distribuidores oficiais realizan descontos durante esta feira que van desde os 1.600 ata os 8.000 euros, dependendo do modelo. Ademais, ofertan financiamento especial ou cinco anos de mantemento gratis.
Neste escaparate de 9.000 metros cadrados de superficie, que mostra os últimos modelos de 32 marcas diferentes, pódese comprar desde un utilitario por 9.000 euros ata un deportivo por 240.000 euros, como o Ferrari California, cunha potencia de 460 CV e unha velocidade máxima de 310 quilómetros por hora.
Aínda que non é o máis caro, o modelo exposto costa 215.000 euros, a estrela deste salón é o Mercedes SLS 63 AMG, coñecido como 'ás de gaivota', de 571 CV e que pode chegar aos 317 quilómetros por hora.
Na inauguración deste certame, o seu director, José Enrique Elvira, afirmou onte que espera «alcanzar o éxito» da pasada edición, con preto de oito millóns de euros de facturación e uns 18.000 visitantes, cifras que dixo que son «especialmente significativas neste período de crise ao que non é alleo o sector da automoción».
José Enrique Elvira, que estivo acompañado polo alcalde e o xefe territorial da Consellería de Economía e Industria, agregou que o obxectivo desta feira é «dinamizar o sector» en Lugo.
