Os dous paseos máis transitados da capital lucense, o do Intre e o do Miño están cheos de trampas para os pés e as rodas das bicicletas. As riadas do pasado inverno fixeron estragos nos carreiros que transcorren pola beira dos ríos e as obras de restauración anunciadas polas administracións locais para cada unha das zonas están sen acabar.
O paseo do Intre viuse danado polas abundantes choivas rexistradas durante o inverno, ás que se sumaron as dunha primavera pasada por auga. Estas últimas fixeron que os traballos de recuperación da contorna previstos pola Deputación quedasen paralizados ata día de hoxe. E é que a realidade é que pasadas as choivas e en pleno verán aínda se aprecian nalgunhas zonas deficiencias, sobre todo no pavimento.
