Os cemiterios viviron onte o seu día grande coa festividade de Todos os Santos. Centos de persoas acudiron aos camposantos de toda a provincia para cumprir coa tradición de recordar aos mortos con ofrendas florais. A pesar de que a choiva non enturbou finalmente a xornada, a afluencia de xente no cemiterio de San Froilán foi menor a outros anos.
O día festivo transcorreu con normalidade sen que se producise ningún tipo de incidente. Os condutores non sufriron os atascos doutros anos para acceder ao recinto nin tampouco houbo grandes problemas para atopar aparcadoiro.
Moitos lucenses optaron por ir nos días previos a limpar as sepulturas e colocar as flores. Segundo informaron os traballadores do cemiterio, "a semana foi completa" cun goteo incesante de xente. Incluso se produciron máis atascos de vehículos o venres, cando non había un oco libre onde deixar o coche, que o propio día de Santos.
