Os propietarios dos 60 nichos da ampliación ilegal do cemiterio de San Salvador de Muxa que o TSXG ordenou baleirar de restos mortais e derrubar no prazo de 20 días buscarán deter a execución da sentenza apelando a que algúns deles non recibiron ningunha notificación por parte do tribunal.
Os afectados pola decisión xudicial xa comezaron a buscar asesoría legal para tratar de atrasar unha demolición que o concelleiro de urbanismo, Luís Álvarez, considerou como «incumprible» no prazo dado polo TSXG. Así, fontes consultadas explicaron que a falta de comunicación a algúns dos propietarios por parte do alto tribunal ou das diferentes administracións pode ser un incidente que obrigaría a paralizar o proceso legal e sobre este argumento podería basearse o recurso que seguramente presentarán os 60 propietarios.