Os responsables de centros públicos de infantil e primaria do municipio acordaron nunha reunión recente da xunta local de directores deixar de asumir estudantes de prácticas da Escola de Maxisterio. A decisión ten que ser referendada no claustro de cada un dos centros, un paso que xa se deu catro ou cinco, segundo o director de Maxisterio, Francisco Rodríguez Lestegás.
A medida tómase, segundo explicou Manuel Núñez, director do colexio Menéndez Pelayo, cuxo claustro deu onte mesmo deu o visto e prace á proposta, en resposta á retirada da exención de matrícula que ata agora viñan gozando os funcionarios da Consellería de Educación e os seus fillos, que só tiñan que pagar as taxas administrativas, salvo cando se trataba de materias que debían repetir.
Tanto os directores como os docentes que logo foron subscribindo a medida nos claustros consideran que as tutorías de alumnos de prácticas son colaboracións desinteresadas coa Universidade, xa que non reciben ningunha retribución económica por iso, aínda que si se reflicten no seu expediente. Así, consideran que a súa achega non só non é correspondida na mesma medida senón que, ademais, a retirada das exencións «levouse sen un mínimo de delicadeza nin no fondo nin na forma».
A medida deuse a coñecer por parte da Universidade de Santiago no principio do ano, despois de que a Consellería de Educación negásese a compensala, como facía os anos anteriores, polas taxas que deixaban de cobrar por este concepto. A vicerreitora de Economía, Sara Cantorna, cifrara en case un millón de euros a cantidade que a USC deixou de ingresar o pasado curso. Ante a negativa da Consellería de Educación de asumir esas cantidades, as universidades galegas decidiron eliminar esas axudas a partir deste curso.
A Escola de Maxisterio deberá agora buscar praza para os 35 alumnos que quedan sen un lugar para facer as prácticas, posto que xa estaban distribuídos entre os centros que retiraron o seu apoio. Segundo o seu director, Francisco Rodríguez Lestegás, intentarase recolocalos nos colexios que manteñen a colaboración coa escola, como os colexios concertados ou os públicos do resto da provincia.
Os novos graos de infantil e primaria teñen unha carga de créditos prácticos superior á da diplomatura.
