aquí non hai Halloween, pero nos últimos anos está a rexurdir a celebración, de orixe celta, coñecida como Samaín. O Concello fíxose eco este ano desta festa, que coincide coa noite previa a Todos os Santos. E, desta forma, unha procesión de ánimas camiñará pola muralla para celebrar o Samaín. Será a noite do día 31 polo adarve e os participantes deixarán cabazas iluminadas con velas en diferentes puntos do monumento.
Lugo celebrará por primeira vez o Samaín, unha antiga festa que marcaba o final do verán e o inicio do ano celta antecesora de Halloween, que se organizaba para honrar a recollida das últimas colleitas e o regreso dos rabaños aos cortellos, pero que tamén estaba vinculada co retorno dos mortos ao mundo dos vivos. Nesta iniciativa colaborarán catro asociacións culturais especializadas no mundo castrexo: Trebas Galaicas, Caetra Lucensium, Lugdunum e Lucus Equites.
O programa, presentado onte polo concelleiro de cultura, Antón Bao, e representantes de colectivos colaboradores, contempla tamén actividades nas prazas da Soidade, A Milagrosa e Augas Férreas. Así os días 29 e 30, nas principais prazas do centro histórico, haberá talleres de cabazas, recortables de papel e maquillaxe para os máis pequenos, pero tamén se celebrará o ritual de vivos e mortos e haberá varias sesións de contos de medo.
O luns 31, á parte dos talleres, o ritual e as sesións de contacontos, tamén se celebrará o conxuro da queimada, ás dez e media da noite na Praza da Soidade, xunto coa procesión. O fin de festa correrá a cargo do grupo de música celta Milesios, que actuará a partir das once na Praza da Soidade.
Coeses celebrará a súa feira de outono este domingo
A parroquia de Coeses acollerá este domingo a súa sexta feira de outono. Durante a celebración da mesma, o Concello informará o proxecto Parnet-TIC e os talleres informáticos que se están levando nos teleclubs rurais. A feira dará comezo ás nove e media, no campo da festa, onde haberá máis de 30 postos de venda e exposición de todo tipo de mercancías, desde produtos alimenticios a artesanía en madeira ou ferro. Tamén se sorteará unha cesta anticrisis.
O novo delegado do Goberno de Galicia visita Lugo
O novo delegado do Goberno en Galicia, José Manuel Pouse Mesura, visitou onte o Concello xunto cos catro subdelegados galegos: o lucense José Vázquez Portomeñe; o coruñés, José Luís Ucieda Somoza, e os de Ourense e Pontevedra, Camilo Isaac Ocampo Gómez e Delfín Fernández Álvarez.
O guitarrista Rafael Muñoz tocou na Casa do Saber
O guitarrista Rafael Muñoz ofreceu onte un concerto comentado de música barroca na Casa do Saber. Acompañado de guitarra barroca e tiorba, o instrumentista ofreceu o recital ‘‘Bailad caracoles (danzas barrocas para corda pulsada)'. O acto foi organizado pola Universidade de Santiago.
