O viveiro de empresas que montou o instituto Politécnico levou a termo o seu primeiro proxecto empresarial: unha páxina web creada por Juan Andrés Pérez, que instalou a súa oficina no centro para desenvolver a súa idea.
jUAN aNDRÉS PÉREZ ten a súa oficina no último piso do Instituto Politécnico. Con todo, non é profesor nin administrativo, senón emprendedor, por iso o centro cedeulle un dos tres locais do seu viveiro de empresas, integrado no programa EduEmprende da Xunta. Ademais dun lugar físico para montar o seu despacho sen preocuparse dos gastos de electricidade, internet ou limpeza durante dous anos, o emprendedor obtén tamén o asesoramento dun profesor do centro. Con estas vimbias, Juan Andrés e o seu socio David Díaz montaron Galdoo, pensada para pór en contacto clientes e empresas.
Os locais acondicionáronse hai varios anos, pero este é o primeiro proxecto do viveiro que chega ata a fase final e sae ao mercado. Antes houbo outros exalumnos que ocuparon este mesmo despacho mentres preparaban o plan de empresa para a súa idea que, finalmente, non saíu adiante. En breve espérase que tamén se some outro emprendedor que desenvolveu xa o seu propio plan, posto que os ciclos contan agora cun módulo no que se lles ensina a realizalo.
