A choiva de pétalos desde os balcóns e fiestras que tradicionalmente distingue a celebración do Corpus Christi na capital quedou onte nun leve reguero ao paso do palio baixo o que se portaba o Santísimo Sacramento. E é que a situación na que se atopaban boa parte dos puntos do centro de Lugo que percorre esta procesión obrigou a reducir o traxecto aos testemuñais cincuenta metros que separan a Praza Pío XII da de Santa María.
De todos os modos, non é pouco, porque para facer posible un percorrido tan modesto, unha ducia de confrades traballaron desde primeira hora da mañá, nalgún momento axudados incluso polo propio bispo, Afonso Carrasco.
