O director xerente da S.A. de Xestión do Xacobeo, Ignacio Santos, avanzou que traballa para contratar un artista ou grupo internacional de nivel "similar" a Placebo —que suspendeu a actuación prevista para o 8 de outubro por enfermidade do seu cantante— para organizar un novo concerto en Lugo, para o que aínda non está fixada a data.
Así o indicou Santos en resposta a unha pregunta da socialista Concepción Burgo sobre a programación do Xacobeo na provincia de Lugo. O xerente confirmou que traballa para organizar outro concerto antes de fin de ano e coincidindo co décimo aniversario da declaración da muralla como Patrimonio Mundial, aínda que non revelou posibles nomes nin deu unha data.
Pola súa banda, Burgo criticou que o Goberno galego "non ten unha aposta polo interior galego ou polo reequilibrio, tampouco co Xacobeo" e considerou que as actividades do Ano Santo han marxinado a Lugo, a pesar de que catro camiños pasan pola provincia. Santos replicou que se organizaron 160 actos e eventos, dos que 47 dependen directamente do Xacobeo.
A igualmente deputada socialista María Quintas tamén acusou ao presidente da Xunta, Alberto Núñez Feijóo, de non "crer no reequilibrio territorial" e referiuse, en concreto, á provincia de Ourense, que o Goberno galego "ignora". "Descoñecemos se é por interese político e pola loita fraticida do PP na provincia", dixo.
