O PXOM ve a luz e abre un novo deseño urbanístico para o 95% do territorio de Lugo

Quince anos logo de empezar a perfilarse o novo Plan Xeral de Ordenación Municipal (PXOM) e logo de superar múltiples obstáculos, o Concello viu onte publicado no Boletín Oficial da Provincia o 95% do documento urbanístico que virá substituír ao vixente desde 1990 e que poderá comezar a desenvolverse a partir do 5 de marzo, unha vez superados os 15 días hábiles de trámite ata lograr a oficialidade. O plan, que consta de 3.033 páxinas, está publicado en formato dixital no portal da Deputación e a web do Concello.

O novo PXOM, que foi aprobado no seu día cos votos a favor de PSOE e PP, afecta á totalidade do chan urbano da cidade, uns 11,2 millóns de metros cadrados, e incorpora 7.000.000 de metros cadrados de chan urbanizable, 4.500.000 para uso industrial e actividades económicas, 3.000.000 para sistemas xerais e zonas verdes e 1.800.000 para equipamentos. Quedan pendentes de validar uns 60 nucleos rurais e varios urbanizables en parroquias que a Consellería de Medio Ambiente, Infraestruturas e Territorio deixou en suspenso ata que o Concello xustifique a súa catalogación.

Pero a inminente entrada en vigor do PXOM dará pé ao desenvolvemento de bolsas de chan en distintos barrios da cidade que levaban paralizadas desde hai anos, aínda que o impulso do documento urbanístico chega nun momento no que a falta de financiamento mantén baixo mínimos a promoción de vivenda. Entre os barrios que se beneficiarán da nova achaiadura están O Carme, A Piringalla, A Milagrosa, A Cheda, Sanxillao ou Abella.

As Gándaras ou A Campiña, onde tamén hai prevista unha importante bolsa de chan industrial, tamén se verán afectados co PXOM, aínda que neste caso tamén a crise económica augura que o desenvolvemento destas zonas non será inmediato.

Pero non só os donos de solares e leiras veranse beneficiados co novo plan, xa que tamén moitos propietarios de edificios, vivendas, entreplantas ou locais comerciais verán legalizados uns inmobles que antes quedaban fóra de ordenación. Neste caso, as cerca 5.000 alegacións recibidas no Concello, así como a negociación entre PSOE e PP permitiron modificar o plan provisional e evitar, por exemplo, a demolición de gran parte do barrio Feijóo.

A protección do patrimonio arquitectónico tamén foi tido en conta no PXOM, onde se ampliou o número de edificios catalogados nun 10%, mentres que o 80% do territorio do municipio terá algún tipo de cláusula de defensa ambiental.

Reaccións

O alcalde felicitouse onte do «amplo consenso» logrado para a aprobación do PXOM e, tras cualificalo como «unha ferramenta extraordinaria», asegurou que o documento permite regular o desenvolvemento da cidade para os próximos quince anos. José López Orozco destacou que o novo plan estivo exposto ao público «con luz e taquígrafos» durante dous meses e aínda que admitiu o atraso na tramitación, dixo que isto non impediu que a cidade continuase crecendo e os seus habitantes gozasen da vivenda máis «barata de España».

Pola súa banda, o edil de urbanismo, Luís Álvarez, explicou que o Concello segue traballando na validación por parte da Xunta do outro 5% do PXOM, aínda que aclarou que 34 núcleos que quedaron en suspenso contan xa coa aprobación inicial da consellería.

Mentres, o edil do PP Arcadio Silvosa aproveitou a publicación do plan para recordar as achegas realizadas polo seu grupo ao documento, que apoiou nun «exercicio de coherencia e responsabilidade», dixo. Así, Silvosa sinalou que grazas ao grupo popular «salváronse máis de 2.000 edificios de diferentes barrios que quedaban afectados pola aliñación da rúa e por alturas, máis de 20 naves do Ceao e máis de 20 casas da subida de Nadela», sinalou.