Os apaixonados da marca británica Mini puideron probar onte polas estradas e rúas de Lugo os novos modelos que acaban de saír ao mercado grazas á iniciativa posta en marcha por Lugauto, o concesionario da firma na cidade, desde cuxas instalacións partiron ata 80 condutores que se inscribiron nunha proposta totalmente gratuíta.
En total foron cinco vehículos de tres modelos diferentes os que foron postos a disposición dos lucenses, sendo o Mini Coupé, un novo biplaza deportivo, o que causou máis sensación entre os participantes. Os condutores puideron ver ao longo da tarde as evolucións tanto na estrada como en rúas e avenidas duns modelos que destacan tanto polo seu deseño como pola súa variada motorización.
Carlos Cal, de Lugauto, destacou a gran acollida que tivo esta iniciativa, na que os lucenses tamén puideron probar o Mini Cooper e o Mini Countryman.
Curso de baristas no restaurante Porta de Santiago
Un total de doce alumnos iniciaron no restaurante Porta de Santiago un curso para baristas no que, ademais de nocións sobre historia e características do café, aprenderán a preparalos nas súas diferentes modalidades. O seminario, impartido por Alfa Meta Formación, está dirixido a traballadores da hostalería e consta de 20 horas de clases prácticas e 30 a distancia. Ademais de café quente, os alumnos tamén recibirán nocións sobre como elaborar cócteles, con e sen alcol.
III Premio Lucus Augusti de Fotografía Profesional
O alcalde José López Orozco e o presidente da Asociación de Fotógrafos de Lugo, Cesar Quijada, presentaron onte as actividades que se van a levar a cabo dentro do III Premio Nacional Lucus Augusti de Fotografía Profesional 2011. Así, Quijada explicou que se organizará unha exposición de obras, que se poderán ver do 17 ao 24 de novembro no Museo Provincial. Ademais, ese último día entregaranse os premios dos catro apartados -retratos, industrial/publicidade/moda, reportaxe social de voda e libre creación-, nun acto no que haberá relatorios de José Benito Ruiz, que traballou para National Geographic, e do italiano Antonio Fascicolo, especialista en publicidade e moda.
Alumnos do IES Leiras Pulpeiro percorren o Camiño
Profesores do departamento de Xeografía e Historia do IES Leiras Pulpeiro e un grupo de 28 alumnos de 4º diso realizaron o Camiño de Santiago entre Sarria e a capital galega durante a ponte de Santos, o que indica que nalgúns centros públicos aínda se organizan actividades extraescolares pese ao boicot do profesorado polo conflito coa Xunta.
