O xulgado de instrución número 1 citará como imputadas a ao redor de cinco persoas pola operación Polbo, que se desencadeou o pasado venres cun rexistro na Deputación Provincial que durou case once horas e no que a Unidade de Delincuencia Fiscal da Policía levou documentos e envorcou o contido de numerosos computadores, sobre todo nos departamentos de comunicación, protocolo e contratación.
O xefe de protocolo, Juan Carlos Fernández Pulpeiro, é o único imputado polo momento nas dilixencias, iniciadas en 2013 co número 2097. As pescudas realizadas ata o momento indican que outras cinco persoas son as que serán chamadas a declarar nesa calidade, aínda que a cifra podería variar despois de que os policías especializados analicen a abundante información intervida.
