Abeiro Gold, que será a residencia privada para maiores con máis prazas da capital lucense, abrirá antes de que finalice o ano. A súa directora, Iria Rei, afirmou onte, nunha nota, que as obras marchan a moi «bo ritmo», polo que prevé que a inauguración se realizará «a mediados de decembro, o que nos permitirá estar a funcionar a pleno rendemento logo de Nadal».
Os construtores comunicáronlle onte aos directivos da sociedade que xestiona este xeriátrico, da que o 98% do capital é lucense, que prevén que entregarán a obra a finais deste mes.
Esta residencia para maiores cunha superficie construída de máis de 8.800 metros cadrados, supón un investimento de 10 millóns de euros. Dispón de 190 prazas para residentes válidos e asistidos, que se reparten en 74 habitacións dobres e 42 individuais, e outras 30 prazas para centro de día.
