Unha investigación iniciada hai doce anos en relación coa suposta descapitalización da empresa distribuidora Severino Prado SL, con sede no polígono do Ceao, chegará finalmente a xuízo nos próximos meses. En total hai 19 acusados, que se enfrontan a penas que suman máis de 108 anos de prisión e ao pago de ao redor de 150.000 euros en multas.
O escrito de acusación consta de 14 folios e nel descríbense as prácticas levadas a cabo, segundo o fiscal, polos donos desta sociedade familiar, integrada polos dous herdeiros do fundador e os tres fillos dun destes, para desfacerse da maior cantidade de bens posible tras crebar a empresa co fin de eludir as súas responsabilidades económicas con empregados e provedores. A denuncia foi interposta no seu día polo despacho de avogados Goñi, en representación dos traballadores despedidos e que non foron indemnizados porque a sociedade mostrábase como insolvente.
