O alcalde de Lugo, o socialista José López Orozco, anunciou que o Concello da capital está disposto a pagar a cantidade na que o Xurado de Expropiación Forzosa de Galicia fixou a tasación do antigo cárcere do Partido Xudicial, un total de 2.366.689 euros, sempre que os servizos xurídicos municipais, que están a analizar a resolución, desaconsellen a interposición dun recurso contra devandita decisión.
A tasación realizada polo citado xurado sobe en 861.075 euros a valoración efectuada polos técnicos do Concello de Lugo, que foi recorrida por varios dos concellos do partido xudicial que teñen parte na propiedade dese inmoble, polo que reclamaban o pago de 5.801.422 euros.
"Os servizos xurídicos do Concello están a estudar a resolución deste xurado. Se din que recorramos, recorreremos, e se non, pagaremos eses 800.000 euros máis. Non é tanto, porque dentro desa cifra tamén está incluída a parte do Concello de Lugo", precisou o alcalde en declaracións recollidas por AGN.
López Orozco opina que "entre o que pedían eles, máis de cinco millóns de euros, e o que lles ofrece o xurado de expropiación hai unha gran diferenza, o que demostra que non fixemos unha tasación tan mala como nos dicían ao principio".
Tras fracasar as negociacións cos demais municipios para facerse coa propiedade do edificio, o goberno local iniciou en 2008 o expediente de expropiación, en base a unha tasación que fixaba en 1.505.614 euros o prezo do inmoble, para rehabilitalo con axuda do plan europeo Urban e convertelo nun centro cultural.
A negativa dos demais concellos a aceptar a cantidade taxada como pago, sobre todo por parte dos catro municipios gobernados polo PP, fixo obrigatoria a mediación do Xurado de Expropiación de Galicia, un órgano colexiado da Administración autonómica especializado en fixar o prezo xusto dentro dos procedementos de expropiación forzosa.
O Concello de Lugo ten o 30,8% do vello cárcere, mentres que Friol posúe o 13,8%; seguido de Castro de Rei, co 11,2%; O Corgo, co 10,7%; Castroverde, co 9,01%; Guntín, co 8,84%; Outeiro de Rei, co 8,11%, e Pol, co 7,43%.
