O Concello segue dando os pasos necesarios para executar a sentenza do Tribunal Superior de Xustiza de Galicia (TSXG) que ordena derrubar os nichos da parte ampliada do cemiterio de Muxa. Entre eses pasos está a notificación aos afectados; algúns xa as recibiron, pero non todos. Este punto é importante, porque o prazo legal para a presentación dos posibles recursos non comeza ata que todos eles estean avisados oficialmente.
Trátase de case sesenta nichos, unha vintena dos cales están ademais ocupados. O TSXG ordenou ao Concello que no prazo de vinte días acreditase que estaba a dar os pasos necesarios para executar a sentenza de demolición.
