A reordenación dos horarios do persoal municipal e o peche das oficinas do antigo seminario os sábados deberá esperar polo menos 15 días tras o rexeitamento dos sindicatos á proposta presentada onte polo goberno na mesa de negociación. Ningún dos delegados presentes na reunión apoiou o cambio deseñado pola concellaría de servizos xerais, polo que o executivo e os sindicatos déronse 15 días de prazo para celebrar un novo encontro, aínda que nos próximos días haberá novos contactos de cara a elaborar unha proposta consensuada.
O salón de plenos acolleu onte unha reunión cos membros do comité de empresa e da xunta de persoal, á que asistiron o alcalde José López Orozco, o primeiro tenente de alcalde, Antón Bao, e o edil de servizos xerais, Francisco Fraga. A proposta rexeitada polos sindicatos expuña a implantación dun horario de luns a venres, de 8.00 a 15.00 horas, para a administración xeral, así como dúas tardes á semana para completar a xornada de 37,5 horas, pero eliminando a posibilidade de facelo os sábados. Para os servizos con quendas, expúñanse outro tipo de horarios.
O presidente do comité de empresa, Jesús Expósito, dixo que a proposta «non ten sentido» e dubidou de que se poida chegar a un acordo se non se producen cambios substanciais. Pola súa banda, o edil Francisco Fraga apostou por dialogar ata o último momento e confirmou que o adiamento afecta á implantación do sistema para fichar con pegada dixital, que se ía a iniciar en xullo.