En Lugo recorreron á fórmula da arbitraxe 7.387 dos 8.978 clientes de Novagalicia Banco que adquiriron participacións preferentes e subordinadas. Os que viron aceptadas as súas solicitudes recuperarán 60 millóns.
Os clientes da entidade en Lugo investiron neses produtos 219 millóns de euros. Os datos evidencian, segundo a información de que dispón a entidade, que Lugo é a provincia galega menos afectada pola venda deses produtos financeiros e a segunda en maior porcentaxe de recuperación dos investimentos.
As preferentes máis antigas, as máis gravosas
- Os aforradores que compraron preferentes nos anos 2003 e 2005 van ser os máis prexudicados no proceso de recuperación dos investimentos. Neses casos, os clientes só recuperarán en torno ao 35 por cento do seu capital.
Novagalicia Banco considera «extraordinarias» as relacións coa Deputación
Novagalicia Banco non respondeu onte de forma oficial ao acordo plenario da Deputación que establece que o ente provincial cancelará os seus acordos co banco se non devolve o cento por cento das preferentes. No entanto, fontes da entidade defenderon onte que as relacións coa Deputación son «extraordinarias».
