O grupo municipal de Lugonovo denunciou que nun colexio de Lugo leváronse a cabo traballos de fumigación cando os alumnos do centro atopábanse en horario lectivo, polo que pedirá información ao goberno local sobre os produtos químicos que se están utilizando nese tipo de labores.
Segundo informou Lugonovo, o edil Iñaki García preguntará na Comisión de Desenvolvemento Sostible e Persoal polo "horario no que está previsto que se realicen os traballos de fumigación nos centros educativos", así como pola natureza dos produtos empregados, para saber se "teñen algún tipo de contraindicación tanto para a saúde como para o medio ambiente".
"Esta mañá tivemos coñecemento de que no colexio de Nadela os operarios fumigaron a contorna do recinto escolar coincidindo co inicio das clases e a entrada dos nenos no centro", precisou.
Ao seu xuízo, non parece "o momento máis oportuno para acometer eses traballos", polo que anunciou que solicitará información "sobre cales son os químicos que se utilizan neses labores e cal é a marxe horaria para facelos, por se é posible levalos a cabo cando as instalacións están baleiras".
