As festas da Milagrosa dixeron adeus ata o ano que vén. Logo de varios días consecutivos de verbenas e actos de todo tipo, os veciños do barrio despediron onte as festas coa celebración do Día Infantil. Para iso, organizaron no recinto feiral unha chocolatada, que comezou ás cinco e media da tarde e onde os rapaces tamén foron invitados tamén a outras bebidas sen alcol.
Ademais de porse de chocolate con churros ata as botas, os nenos gozaron do espectáculo dos magos Manuel Lamas e Diego López, que fixeron as delicias dos pequenos cos seus trucos.
Tras a chocolatada, ás oito, os grupos de baile e canto da asociación cultural Cantigas e Flores percorreron as principais rúas do barrio, animando aos veciños coas gaitas.
Actuación do pallaso Iván Prado en Palestina
Cada vez hai menos fronteiras para lucenses. Iván Prado, que exerce de pallaso na asociación Pallasos en Rebeldía, atópase estes días en Palestina, no Festiclown, que comezou o pasado día 1 en Nablús e terminará o 15 en Ramala.
O Festiclown Palestina, dirixido por Iván Prado, é un festival de circo, clown e risoterapia que, durante dúas semanas, está a levar actuacións de máis de vinte compañías internacionais (España, Arxentina, Chile, Estados Unidos, Portugal) e varias compañías e artistas locais ás rúas de varias cidades palestinas (Xerusalén, Ramala e Nablús) e diferentes campos de refuxiados.
A nivel internacional, o festival conta coa participación de artistas da talla de Leo Bassi ou Patch Adams. A nivel local, cabe destacar a participación da escola de circo de Nablús, Assirk Assaghir.
O Festiclown terminará o día 15 co Formaclown, que terá lugar desde o día 12 en Ramala e Nablús e que incluirá talleres e actuacións en campos de refuxiados e hospitais.
Vandalismo na praza da Horta do Seminario
O vandalismo fixo acto de presenza na praza da Horta do Seminario. Descoñecidos derrubaron unha árbore plantada nas proximidades do monólito que a Asociación de Escritores Galegos e o Concello colocou en homenaxe ao escritor Paco Martín o pasado mes de xuño.
Afortunadamente, trátase dun dos primeiros actos vandálicos labores nesta praza.
Reunión de asociacións para organizar o Día do Veciño
A Federación de Asociacións de Vecinos de Lugo, que preside Jesús Vázquez, reunirase hoxe para estudar diversos puntos, pero en especial a preparación das actividades para a celebración do Día do Veciño, que se fará o próximo 25. A reunión será no local da propia federación, unha organización que reúne a máis dun centenar de asociacións.
Trátase dunha actividade, que realiza a federación de asociacións desde hai varios anos e cuxo obxectivo principal é estender lazos entre os veciños dos distintos barrios da cidade nunha xornada lúdica e festiva.
