O cantante Francisco non actuará o próximo 15 de xullo no Teatro Jovellanos ao decidir este xoves Divertia, a sociedade que xestiona os festexos da cidade de Xixón, suspender o concerto tras os insultos que proferiu á vicepresidenta valenciana e líder de Compromís, Mónica Oltra.
O consello de administración de Divertia tomou esta decisión durante a reunión que este xoves mantivo nas oficinas da entidade, onde se acordou tamén devolver a partir do luns o importe das localidades que xa se venderon a prezos que oscilaban entre os 25 e 40 euros. "As lamentables declaracións de don Francisco González vertidas contra dona Mónica Oltra, vicepresidenta e conselleira de Igualdade e Políticas Inclusivas da Generalitat Valenciana", motivaron esta decisión, segundo reflicte un escrito subscrito polo concelleiro de Deportes, Turismo, Festexos e Mocidade de Xixón, Jesús Martínez Salvador, de Foro.
Para o edil, as reaccións a estas declaracións poderían "activar desordes públicas e enfrontamentos que porían en risco a normal celebración do seu concerto, a propia seguridade do artista e tamén dos espectadores que accedesen o recinto". Desde Divertia tamén consideran extinguido o contrato subscrito con Música, Arte y Sueños S.L. (empresa con quen se asinou o citado contrato de actuación) ao ceder esta os seus dereitos a un terceiro sen mediar o preceptivo e indispensable consentimento de Divertia Gijón S.A.
Francisco arremetera nas redes sociais contra a vicepresidenta valenciana por criticar tras as eleccións do 26 de xuño a quen seguían votando ao PP a pesar dos casos de corrupción.
O cantante valenciano lanzou unha serie de comentarios machistas contra Oltra, á que tamén tachou de "escoria" ou "descerebrada", afirmacións polas que posteriormente pediu perdón.
