"¿Vedes este abrigo? Necesitaba algo vermello, así que saín e atopeino en oferta. É a última peza de roupa que vou comprar". Con esta rotunda afirmación expresaba a actriz Jane Fonda o seu firme compromiso co movemento xuvenil que loita contra o cambio climático. A octoxenaria intérprete referíase ao abrigo que xa converteu nunha auténtica icona desta causa ao levalo cada venres desde hai máis dun mes cando participa nas protestas ás portas do Capitolio para esixir ao presidente Trump medidas concretas contra o quecemento global. Con el detivérona xa en varias ocasións.
Unha peza, un símbolo, que adquiriu por 500 dólares nuns grandes almacéns e cuxa cor elixiu inspirada nunhas palabras da activista Greta Thunberg, que chamou a actuar para preservar o planeta "coma se a nosa casa estivese en lapas".
Fonda quere con este xesto concienciar sobre a necesidade de pór freo ao consumismo, consciente de que a industria da moda é unha das máis contaminantes. "Realmente non necesitamos seguir comprando. Non debemos buscar comprar a nosa identidade. Non necesitamos máis cousas", recalcou.
