Teresa Borrego Campos, coñecida como Terelu e filla da xornalista María Teresa Campos, foi intervida este mércores pola mañá "satisfactoriamente" do cancro de mama que padece, segundo informou nun comunicado a Fundación Jiménez Díaz.
O doutor Díaz Miguel foi o encargado de realizar á popular presentadora de televisión unha tumorectomía —un tipo de cirurxía de conservación do seo— na mama esquerda e, segundo o parte médico, a paciente atópase "estable e recuperándose".
O pasado 6 de xullo Terelu Campos comunicou que fora diagnosticada por segunda vez dun cancro de mama.
Antes, en xaneiro de 2012, a xornalista anunciou a súa retirada da televisión durante un tempo indeterminado por un carcinoma maligno no peito dereito, do que a trataron no mesmo hospital.
