Rouban en San Juan máis de 22.000 euros ao actor Benicio del Toro

O actor portorriqueño Benicio del Toro foi vítima este domingo dun roubo nunha vivenda na que se hospedaba en San Juan e da que foron furtados 17.000 dólares (ao redor de 15.000 euros) en efectivo e numerosos aparellos electrónicos, informou este luns a policía.

As forzas de seguridade indicaron nun comunicado que o propio actor interpuxo unha denuncia ante a policía por un roubo nunha vivenda que alugara mentres permanecía na illa.

O actor atópase en Porto Rico tras participar e liderar o pasado mércores, xunto a Ricky Martin, Residente, Bad Bunny e iLé -irmá de Residente- e Tommy Torres, unha macro manifestación no Viejo San Juan para pedir a dimisión do gobernador, Ricardo Rosselló, inmerso nun escándalo político.

Nun comunicado a policía informou este luns que investiga os feitos acaecidos nunha vivenda na zona da capital coñecida como Ocean Park.

Na súa querela Del Toro sinala que entre as tres e as cinco e media da tarde deste domingo "alguén entrou ao cuarto" que alugara e onde se estaba hospedando e apropiouse de 17.000 dólares en efectivo (ao redor de 15.000 euros), dous aneis valorados en 2.000 dólares (1.783 euros), dúas cadeas e unha pulseira valoradas na mesma cantidade, un iPod, de 300 (ao redor de 260 euros) e unha tableta valorada, tamén, en 2.000 dólares.

Ademais fóronlle subtraídos un pasaporte de Estados Unidos e un de España.