O príncipe Harry púxose este venres detrás dun micrófono co músico estadounidense Jon Bon Jovi nos emblemáticos estudos de Abbey Road, en Londres, con motivo da gravación dun tema con fins benéficos.
O líder do veterano grupo de rock and roll Bon Jovi atópase no Reino Unido promocionando o seu próximo álbum, 2020, que sairá ao mercado o próximo 15 de maio.
O cantante, ademais, está regrabando un dos temas que incluirá nese traballo, titulado Unbroken, xunto co coro Invictus Games Choir, xestionado pola organización benéfica Help For Heroes, e composto por persoal militar e veteranos de guerra lesionados e enfermos, nos mesmos estudos empregados por The Beatles en 11 dos seus álbums.
Todos os beneficios derivados desa canción serán para a fundación caritativa Invictus Games, que puxo en marcha o fillo menor de Carlos de Inglaterra e que apoia eventos deportivos internacionais para veteranos do exército lesionados ou enfermos.
A melodía pretende captar a atención sobre o trastorno de tensión postraumática que padecen moitos veteranos de guerra.
O duque de Sussex, que dará un paso atrás como membro da realeza británica a finais do próximo mes, divulgou este venres na súa conta de Instagram un vídeo no que se lle ve cantando xunto con Jon Bon Jovi nos míticos estudos de gravación.
Ambos se fotografaron ademais no famoso paso de peóns onde pousou no seu día para a portada do seu álbum Abbey Road o cuarteto de Liverpool.
