Martiño Rivas está a facer o Camiño de Santiago xunto a outros tres influencers galegos: Gala González, Xurxo Carreño e Cristina Cerqueiras. Percorren xuntos, desde o pasado xoves e ata mañá, catro etapas do Camiño Portugués da Costa para promocionar a ruta xacobea entre os mozos.
Pero para o intérprete galego é máis que traballo. Esta aventura, segundo contaba durante a súa presentación, "é un sentimento espiritual, unha oportunidade de renacer do corpo e da mente. De volver soñar". Un punto e aparte para a súa etapa vital máis complicada.
ADEUS AO SEU PROXECTO DE FAMILIA. Sempre discreto coa súa vida privada, en decembro de 2020 coñecíase a ruptura do actor galego coa bailarina de orixe asiática Kayoko Everhart tras tres anos de relación e unha filla pequena en común. A noticia chegou acompañada do escándalo, xa que transcendeu por unha investigación do Ministerio de Cultura, tras ser nomeada Kayoko primeira figura da Compañía Nacional de Danza e descubrirse que esta elección a decidiu o director da compañía, Joaquín de la Luz, co que a moza iniciara unha nova relación sentimental.
O fillo do escritor Manuel Rivas tratou de curar as súas feridas en privado e seguiu co seu traballo. E só hai uns días permitiuse presumir por primeira vez no seu perfil de Instagram da súa faceta de pai orgulloso ao compartir unha imaxe xunto á súa pequena, Ayo, na que ambos aparecen de costas á cámara baixo a mensaxe "encántame esta foto".
MOITO TRABALLO. E se os inicios do 2021 foron duros no terreo persoal, no profesional non se pode dicir o mesmo. Martiño Rivas arrincou o ano coa xira —que incluíu Lugo no seu percorrido— da obra teatral Jauría, unha peza escrita a partir das transcricións do xuízo realizado á Manda. Tras Jauría, o intérprete comezou a rodaxe dunha nova serie para RTVE, Fuerza de paz, que relata as aventuras dun grupo militar desprazado a Guinea Ecuatorial para o que todo cambia coa morte dun dos seus membros. Para prepararse para o papel, Martiño someteuse a un intenso adestramento que deixou pegada no seu físico, agora moi musculado.
O primeiro foi coa ourensá Sara Casasnovas, á que coñeceu na rodaxe de Los girasoles ciegos. O romance durou case o mesmo que este.
A súa relación máis longa foi con Irene Escolar, coa que estivo do 2008 ao 2017. A súa foi unha ruptura inesperada, xa que Martiño e a neta de Irene Gutiérrez Caba estaban considerados unha parella sólida.
