Ao redor de 200 invitados asistiron este sábado á voda do dianteiro do Celta Iago Aspas e Jenni Rueda, que se viu eclipsada mediáticamente polo enlace de Sergio Ramos e Pilar Rubio en Sevilla. Tanto os noivos como os invitados mantiveron en segredo a data do enlace ata o mesmo día da celebración.
A cerimonia, que tivo lugar no restaurante Pepe Vieira en Raxó, Poio, foi oficiada pola alcaldesa de Moaña, Leticia Santos e estivo amenizada polo grupo Broken Peach. Tampouco faltaron fogos artificiais na festa.
O dianteiro do Celta chegou á cerimonia nun deportivo vermello xunto á súa nai. Pouco despois, apareceu co seu pai Jenni Rueda, que lucía un escotado vestido branco de tul e pedrería.
Acompañaron a Aspas no seu gran día xogadores da talla de Vicente Iborra, Hugo Mallo, Aleix Vidal, Nolito, Ever Banega ou Gerard Deulofeu.
Con este enlace Aspas e Rueda selan unha longa relación froito da cal naceron os seus dous fillos, Thiago, de dous anos, e Miña, de sete meses.
