A princesa Leonor e a infanta Sofía atópanse en Estados Unidos onde asisten durante un mes a un campamento de verán infantil para completar a súa "formación académica e persoal", informaron fontes do Palacio da Zarzuela. As fillas dos Reis van estar no campamento ata finais deste mes, cando regresarán a España.
Zarzuela non especificou en que sitio concreto de Estados Unidos ten lugar a escola de verán infantil, na que dona Leonor e dona Sofía van ter ocasión de mellorar o seu nivel de inglés.
O obxectivo de don Felipe e dona Letizia é que as súas fillas "reciban formación complementaria á súa escolarización en España nun ambiente de intercambio cultural con nenas e nenos de diferentes nacionalidades".
Tamén desexan que a estancia en Estados Unidos "lles poida achegar novos coñecementos e experiencias con actividades acordes coa súa idade", engaden as fontes.
Está previsto que cando regresen de Estados Unidos, a Princesa de Asturias e a infanta viaxen cos Reis a Mallorca para estar uns días na illa, como é tradicional.
As fillas dos Reis gozan do campamento estival unha vez terminado o curso no colexio privado Santa María dos Rosales, no madrileño distrito de Moncloa-Aravaca.
A Princesa de Asturias, que en outubro cumprirá 13 anos, terminou o seu primeiro curso de Educación Secundaria Obrigatoria (ESO), mentres que a súa irmá, de 11, fixo quinto curso de Primaria.