Cristiano Ronaldo, ex do Real Madrid e actualmente no Juventus de Turín, casou en segredo coa súa parella, a modelo Georgina Rodríguez, nunha cerimonia en Marrocos blindada á presenza de xornalistas, segundo asegura a revista do corazón italiana Novella 2000.
Os rumores sobre unha posible voda do dianteiro portugués empezaron este agosto, cando Rodríguez publicou en Instagram unha foto falando de Cristiano como o seu "marido". Estes rumores veríanse confirmados se se dá como certa a información do semanal italiano, que asegura que o amigo do futbolista Badr Hari organizou a cerimonia.
De acordo coa revista, a nai de Cristiano Ronaldo, Dolores Aveiro, acollería con satisfacción o matrimonio. E o portugués modificaría o seu testamento para incluír á súa agora esposa, segundo dixo unha persoa próxima á parella a Novella 2000.
Durante a pasada fin de semana, polo menos 14 medios de comunicación portugueses fixéronse eco da noticia e deron por feito o enlace entre a estrela do fútbol e a modelo.
As redes sociais alagáronse de mensaxes de felicitación e de asombro, aínda que tamén hai estrañeza pola hipotética forma inesperada de proceder da parella.
Nos últimos días, Georgina Rodríguez colgou un storie en Instagram no que aparecía, xunto a Cristiano, no restaurante Scott's do prestixioso barrio londiniense de Mayfair. O diario The Sun asegurou que a parella estivo 15 minutos no local e gastou 31.000 euros en dous "soberbios" viños.
