A investigación preliminar aberta en Francia contra o actor francés Gérard Depardieu por violacións "e agresións sexuais", presentada o pasado ano por unha nova actriz, foi arquivada, indicaron este martes a Efe fontes xudiciais.
"As numerosas investigacións efectuadas no marco deste procedemento non permitiron describir as infraccións denunciadas en todos os seus elementos constitutivos", sinalou a Fiscalía de París.
A demanda contra o soado intérprete, de 70 anos, foi presentada o pasado agosto.
Segundo indicou entón a emisora France Info, foi interposta por unha nova actriz e escritora francesa que traballaba nun proxecto literario sobre unha personalidade do cine da que Depardieu é próximo.
A demandante denunciou ser violada no domicilio do actor en París mentres colaboraba con el nun proxecto.
Depardieu, coñecido polo gran público por filmes como Cyrano de Bergerac ou Astérix e Obélix, negou categoricamente desde o principio os feitos, aínda que o seu avogado, Hervé Témime, recoñeceu que coñecía á moza que o acusou.
En novembro, compareceu de forma voluntaria ante a policía xudicial no marco da investigación aberta para dar a súa versión do sucedido ante os axentes.