A estabilidade nas catas de cualificación das anadas de Ribeira Sacra é xa algo habitual desde hai unha década. O panel de profesionais que realiza as probas sobre dez mostras das distintas subzonas chega á conclusión de que o sinal a pór é o de moi boa colleita e case sempre a dúas décimas de chegar ao selo de excelencia. Son cousas que ocorren e este ano sucedeu o mesmo, 7,8 puntos.
A cata de cualificación efectuouse no edificio multiusos de San Clodio (Ribas de Sil), pertencente á subzona Quiroga-Bibei, onde se fai por primeira vez porque todos os anos organízase nun concello diferente.
O consello regulador da denominación Ribeira Sacra sinalou que o valor conseguido «para a colleita de 2015 é unha gran noticia para o conxunto das adegas e que de non ser polas choivas durante a vendima, sería excelente». Ademais afirmou que «enxalza a calidade dos viños da comarca» e que «é unha proba máis do bo facer das adegas e viticultores que integran a denominación».
En xeral, o panel de cata, puxo de relevo que os caldos probados presentan «unha cor excepcional respecto dos doutros anos. Algúns son realmente brillantes, de tal forma que é un gran paso a estas alturas do ano porque aínda queda moito tempo para redondearse tanto en adega como en botella», comentou un dos catadores.
Outro dos aspectos que chamou a atención sobre anadas anteriores foi «a estrutura de moitos dos viños probados. Aprécianse taninos e aromas que sen dúbida se reforzarán a medida que pase o tempo. Por iso poden ser viños de longa duración», engadiu unha persoa que estivo na cata.
GRAN COR. Outros catadores, quen tamén mostraron a súa sorpresa ante a «rechamante cor viva que teñen os viños a pesar de que aínda queda moito percorrido ata que estean no seu punto xusto».
Un membro do panel dixo que» para entón talvez conseguirán o nivel de excelentes, aínda que por dúas décimas, xa o son».
