Miércoles. 19.09.2018 |
El tiempo
Miércoles. 19.09.2018
El tiempo

AS 13 ESTRELAS MICHELIN GALEGAS

Galicia suma 13 estrelas Michelin tras recuperar Casa Marcelo a súa

Los chefs españoles con tres estrellas Michelin se hacen un selfie en el Hostal dos Reis Católicos
Los chefs españoles con tres estrellas Michelin se hacen un selfie en el Hostal dos Reis Católicos
A guía de España e Portugal 2016 foi presentada nunha gala celebrada no Hostal dos Reis Católicos na que tamén se recoñeceu a cociña de raíces galegas do restaurante madrileño Lúa

Galicia conta desde este mércores con 13 estrelas Michelin, despois de que Casa Marcelo, o gastrobar de Marcelo Tejedor en Santiago, recuperase a súa nunha gala celebrada no Hostal dos Reis Católicos. Ademais, outra estrela foi parar a Madrid para Lúa e a cociña actual de raíces galegas do chef Manuel Domínguez.

No ámbito estatal, os restaurantes Coque, en Humanes (Madrid), e Zaranda, en É Capdellà (Mallorca), gañan a súa segunda estrela na Guía Michelin España&Portugal 2016, que non recolle ningún novo triestrelado e aposta pola canteira con 15 primeiros recoñecementos, principalmente en Andalucía e Cataluña.

Coque, cos irmáns Mario, Rafael e Juan Diego Sandoval á fronte, mereceu a súa segunda estrela por unha "cociña contemporánea, con raíces madrileñas" que se expresa en dous menús degustación "con incribles xogos cromáticos e exquisitas presentacións", dixo este xoves durante a presentación da prestixiosa guía o seu director, Michael Ellis.

Zaranda, do cociñeiro Fernando Arellano, logrou o seu ascenso grazas a "unha cociña de autor, de excelente técnica, que busca a complicidade coa calidade dos produtos locais, para conseguir sorprendentes fusións de sabores". O restaurante xa gañou unha estrela cando abriu en Madrid, pero se mudou hai unha década a Mallorca, onde a recupera agora.

España non consegue ningún novo tres estrelas desde que na edición de 2014 obtivese a súa terceira DiverXO, do madrileño David Muñoz, pero na de 2016 conserva o seu olimpo de oito triestrelados con Akelarre, Arzak, Azurmendi, O Celler de Can Roca, DiverXO, Martín Berasategui e Sant Pau grazas a que "mantiveron o magnífico nivel nas súas prestacións".

O CURIOSO CASO DE CASA MARCELO. O maior crecemento dáse nas primeiras estrelas, que os inspectores de Michelin outorgan a 15 restaurantes, oito dos cales están en Andalucía e Cataluña: Sollo, Messina e Kabuki Raw na provincia de Málaga; Acanthum en Huelva, Gozar, Hoja Santa e Tresmacarrons en Barcelona, e Emporium en Castelló d'Empúries (Xirona).

Súmanse dúas en Castela e León, o Ermitaño (Benavente, Zamora) e Villena (Segovia), Lúa en Madrid, e Casa Marcelo en Santiago, que se vestiu de gala para acoller esta festa gastronómica na que participaron, entre outras autoridades, o presidente da Xunta, Alberto Núñez Feijóo.

Un caso curioso é o de Casa Marcelo, na cidade anfitrioa, onde Marcelo Tejedor recupera unha estrela que gañou por primeira vez en 2004, perdeu en 2010, volveu gañar ao ano seguinte e devolveuna. En 2013, tras pechar o seu restaurante de alta cociña, abriu un gastrobar onde fusiona as cociñas galegas, nipoa e peruana que volveu a sorprender aos inspectores da guía vermella.

Aínda que a Michelin non fai crecer o ceo das tres estrelas por segundo ano consecutivo, recoñece coas primeiras e segundas "tanto o éxito actual como o futuro prometedor que ten a nosa cociña".

É o caso de Sollo (Fuengirola, Málaga), onde o coñecido "chef do caviar", Diego Gallegos, de orixe brasileira, desenvolve unha cociña sostible e centrada nos peixes fluviais; e de Messina (Marbella), coa cociña "de corte mediterránea actual, con excelentes texturas e sabores marcados" do arxentino Mauricio Giovanini, dous estranxeiros que veñen engrosar unha pequena lista de foráneos con estrelas en España.

Tamén de Kabuki Raw (Casares, Málaga), coa súa cociña nipoa-occidental, que engade a terceira estrela para o Grupo Kabuki, e de Acanthum (Huelva), onde Xanty Elías recupera antigas receitas locais, póndoas ao día en técnica.

A estrela para Hoja Santa, de Albert Adrià, débese á súa "alta cociña mexicana con toques de modernidade"; a de Gozar, dos 'exBulli' Mateu Casañas, Oriol Castro e Eduard Xatruch, á súa creatividade, sabor e alto nivel técnico; a de Tresmacarrons ás coidadas elaboracións de Miquel Aldana, e a de Emporium de Castelló d'Empúries (Xirona) á combinación de raíces rexionais e técnicas actuais dos irmáns Jordà.

A guía francesa recoñece cunha estrela ao Ermitaño, pola súa cociña de raíces castelás e coidadas presentacións, e a Villena, pola súa carta de autor, de base tradicional e delicadas elaboracións.

A Tenerife viaxa outra estrela para El Rincón de Juan Carlos, onde Juan Carlos Padrón "propón unha cociña innovadora de gran nivel, baseada na tradición"; a Bilbao para Zarate polo trato culinario de Sergio Ortiz de Zarate aos peixes; e a Madrid para Lúa e a cociña actual de raíces galegas do chef Manuel Domínguez.

PORTUGAL, SÓ UNHA NOVA. En canto a Portugal, os inspectores da coñecida como guía vermella só outorgaron unha nova estrela a Bon Bon (Carvoeiro, Faro) por unha cociña que "sorprende polo seu nivel técnico, baseada nunha selecta materia prima, con pratos de corte actual, con sabores definidos e coidadas presentacións".

Xa que logo, a Guía Michelin España&Portugal 2016, que se porá á venda este venres, destaca oito restaurantes con tres estrelas pola súa "cociña excepcional", 23 con dúas pola súa "cociña excelente" e 157 cunha por ser "moi bos na súa categoría".

Galicia suma 13 estrelas Michelin tras recuperar Casa Marcelo a súa
Comentarios