Como cada Entroido desde fai 36 anos, As Pontes tinguiuse de verde cunha nova edición da Feira do Grelo, unha cita con fondas raíces que integrou esta vez novas propostas para demostrar que tradición e innovación poden ir da man.
Disposta a enfrontarse ao mal tempo, e a pesar de que a participación no concurso de cestas foi un pouco inferior á doutras edicións, a feira citou por centos de veciños e visitantes decididos a deixarse levar polo sabor entre as máscaras.
Con varias carpas concentradas no centro urbano pontés para retar á choiva, as propostas dun amplo programa achegáronse a todos os sentidos. Así, houbo música coa banda de gaitas Alfaia e a Fanfarria Taquikardia e exposicións de pintura, talleres para nenos, mostras de razas autóctonas e traballo en vivo de varios artesáns da zona. Pero se algún sentido foi o gran protagonista, ese foi o gusto.
Aos tradicionais postos de produtos alimentarios e á venda de grelos sumáronse os freixós -nun día comercializáronse uns 8.000-, unha mostra de froita autóctona e varias food trucks, a gran novidade, que fixo as delicias de moitos padais cunha ampla variedade de propostas gastronómicas nas que o grelo, como era de esperar, ocupou un lugar destacado. Ademais, elaboráronse ao redor de 450 racións de cocido para degustar no patio de Santa María.
"Este ano son moi bos. Non os castigou o tempo, porque non houbo xeadas nin neve", dicía orgulloso LuIs Vázquez, un produtor de Vilalba que conseguiu o primeiro premio no concurso pola calidade do seu manxar verde. "O premio é un impulso para as vendas", comentou un home que comercializa ao redor de 2.000 quilos de grelos anualmente. Josefa Basoa, da parroquia pontesa de Espiñaredo, conseguiu o segundo premio, seguida de Josefa Filgueiras, da parroquia de Aparral. Andrea María Carballo e Carmen Carballeira, ambas das Pontes, xunto a María Luz Vázquez, de Xermade, obtiveron senllos accésits nun concurso que reparte ao redor de 1.500 euros.
Na categoría da cesta mellor adornada, o primeiro premio foi para Luz Divina Alonso, de Espiñaredo, nas Pontes, e o segundo para María José Castro, de Vilalba.
O terceiro quedou deserto, a pesar de que eran moitos os que buscaban entre o verde algunha chiscadela a ese erro de Google que traduciu hai meses na web municipal a Feira do Grelo como feira do clítoris e espertou bromas e titulares ao redor de todo o mundo. A única alusión -tampouco houbo disfraces sobre o tema- correu da man da Cafetería Bahía, que preparou unha tapa especial e sorpresa que ruborizou e fixo rir a moitos dos seus clientes.
A Feira do Grelo rexuvenece nas Pontes
Centos de persoas participaron na trixésima sexta edición dunha cita que integrou o sabor das 'food trucks' e a tradición de sempre
