O conselleiro de Cultura, Educación e Ordenación Universitaria, Román Rodríguez, dixo este luns, ante os rumores de que a familia Franco sacou o Pazo de Meirás á venda, que é "posible" que se trate de "un globo sonda".
"É posible que esteamos ante un globo sonda, non o sabemos. Pero, en todo caso, eu pediríalle a moitas institucións que non caesen en hipotéticas e moi posibles trampas para poder neste caso sacar un rendemento económico", dixo o titular de Cultura en rolda de prensa.
Román Rodríguez referiuse os condicionantes xurídicos que poden facilitar a venda do devandito inmoble e subliñou sobre o pazo de Meirás que "Galicia quere que volva ser patrimonio público partindo dun condicionante inicial: que non haxa que volver pagar" por el.
"A vontade política de Galicia neste asunto está moi clara, de feito hai un acordo parlamentario que imos respectar e basicamente di que Galicia non transfira recursos económicos á familia Franco por mor de compra ou expropiación deste ámbito", aclarou.
Informou de que a Xunta non ten neste momento comunicación "nin oficial nin oficiosa" por parte dos propietarios actuais do pazo de Meirás sobre unha posible venda.
"Como ben é sabido -precisou-, no hipotético caso de que se quixese vender ten que informar, ao ser un BIC (Ben de Interese Cultural), neste caso á Consellería de Cultura, que poderá exercer se quixese, que non é o caso, dereito de retracto".
O conselleiro referiuse a a Comisión de Expertos do Pazo de Meirás, "con reputados xuristas e historiadores", dixo, e expuxo que se trata "dunha cuestión dunha enorme complexidade xurídica e todos os pasos que se adopten teñen que ter unha seguridade xurídica practicamente total".
"A súa hipotética venda (do Pazo de Meirás) é sen dúbida difícil, e de haber algún interesado ten que saber que hai unhas limitacións establecidas por ser un BIC, e o hipotético interesado ten que saber que hai unha serie de condicionantes xurídicos que poidan derivar desta Comisión que van dificultar a compra deste ben", afirmou.
Incidiu o conselleiro de Cultura ao advertir de que "non se caia nunha hipotética trampa que se queira expor ou que non sexan cómplices dunha posible estratexia que vaia orientada a que Galicia lle transfira recursos pola compra deste ben".
