A Xunta rexeitou o proxecto para explotar unha mina de cobre no concello de Touro tras recibir dous informes "desfavorables" e "insalvables". Segundo anunciou a conselleira de Medio Ambiente, Ángeles Vázquez, o proxecto "non garantía a sustentabilidade ambiental", segundo os informes de Patrimonio Natural e Augas de Galicia.
A conselleira apuntou que estes informes negativos, que serán publicados no Diario Oficial de Galicia (DOG) e no Portal de Transparencia da Xunta, indican que "non se garante a protección dunha zona de especial conservación".
Engade que a súa explotación supón, ademais, un risco para "a calidade das augas" no ámbito da mina, cuxo proxecto presentado en 2018 suscitou unha ampla protesta social. Ao ser preguntada pola vía que lle quedaría ao promotor do proxecto para levalo adiante, Vázquez apuntou que "pode recorrer a un contencioso, como calquera técnico".
Sobre a posible influencia da contestación social, especialmente dos veciños de Touro, nesa decisión, a conselleira sentenciou que non tivo importancia "en absoluto". Segundo Vázquez, "son os técnicos os que teñen que informar e ningunha manifestación pesa, só faltaba", exclamou.
A mina permanecía abandonada desde 1986
O procedemento ambiental en relación ao proxecto concluíu tras recibir preto de 1.200 alegacións na súa fase de exposición pública e despois de que dous dos quince informes sectoriais solicitados resultasen negativos. O proxecto de reapertura da mina de cobre asentada entre os concellos coruñeses de Touro e O Pino estaba promovido por Explotaciones Gallegas en colaboración coa multinacional chipriota Atalaia Mining, que anunciou a pretensión de crear uns 400 empregos e investir uns 200 millóns de euros.
A mina permanecía abandonada desde 1986, logo de ser explotada desde 1973, e actualmente só estaba utilizada por Explotaciones Gallegas como canteira para extraer áridos.
REACCIÓN. O portavoz de En Marea, Luís Villares, valorou o "carpetazo" á mina de Touro como "unha contundente vitoria" da mobilización cidadá "en defensa da vida, do medioambiente, a auga, a terra e o futuro de Galicia". Respecto diso, destaca que "foron dous anos de mobilización cidadá que dobregaron finalmente á Administración pública". "O interese xeral prevalece sobre os intereses particulares de rapiña sobre o territorio que unhas empresas desalmadas querían a costa do futuro do noso país", conclúe.
