O vicepresidente da Xunta e conselleiro de Presidencia, Alfonso Rueda, reclamou ao Goberno central un "protocolo de desescalada" para a retirada das máscaras no exterior anunciada por Pedro Sánchez para o vindeiro sábado, día 26.
En declaracións aos medios tras participar no acto de entrega de varios vehículos todoterreo a voluntarios de Protección Civil, Rueda insistiu en que en Galicia esta retirada das máscaras farase "baseada en criterios obxectivos e datos sanitarios" en función do documento que pide que presente o Ministerio de Sanidade.
Un protocolo que, en todo caso, estudarase" na reunión que o comité clínico galego celebra o martes para ver "se hai que adaptalo" á comunidade galega, para ir avanzando nun "proceso gradual, con sentidiño e sen dar pasos atrás", asegurou Rueda.
Neste sentido, espera que o martes se coñezan "máis pasos adiante" na desescalada en Galicia, aínda que non quixo adiantar nada sobre o que poida decidir o comité, máis aló de que haberá noticias en positivo" cada semana.
Rueda criticou o anuncio de Sánchez e asegurou que volveu facer "o que leva facendo" en toda a pandemia, xa que "só aparece cando hai que dar boas noticias e converte o que terían que ser anuncios sanitarios en anuncios políticos", reprochou.
Así, aínda que dixo que se alegra desta medida, recriminou que, a pesar de que Galicia reclamou un protocolo para esta retirada de máscaras en espazos ao aire libre, o Goberno "non acaba de facelo" e só se dedica a anuncialo "inesperadamente" e sen argumentos.
