A Xunta prevé estender a educación dixital a 100.000 alumnos, unha cifra que supón "cubrir o 70 % dos alumnos de 5º de primaria a 4º da ESO", segundo avanzou este xoves o presidente da Xunta, Alberto Núñez Feijóo.
Ao termo da reunión semanal do Executivo autonómico, Núñez Feijóo sinalou que o Consello autorizou dous contratos marco, que suman un importe máximo de 34 millóns de euros para adquirir "ata 45.000 ultraportátiles" para o alumnado e "o equipamento necesario" para a dotación de 2.000 aulas E-Dixgal.
Actualmente E-Dixgal está dispoñible para os centros adheridos, entre 5º de primaria e 2º da ESO, o que supón que máis de 34.000 alumnos destes niveis educativos estuden con libro dixital, equipados con portátil e con acceso en liña e sen conexión á plataforma virtual Eva, onde teñen á súa disposición o contido curricular completo de cada curso.
O Goberno galego tamén deu o visto e prace a unha achega próxima aos 24 millóns de euros para axudas destinadas aos grupos máis competitivos do sistema de I+D+i de Galicia.
Trátase dun "60 % máis" que na anterior convocatoria, segundo Núñez Feijóo, que indicou que funcionan 276 grupos destas características na comunidade, "cuns 2.600 investigadores", grazas á mobilización nos últimos anos de 175,5 millóns de euros.
Entre outros asuntos, ademais, Núñez Feijóo anunciou que o organismo Cixtec desaparecerá e integrarase en Amtega, que pasa a ser "o único organismo" tecnolóxico da comunidade.
O Consello tamén autorizou un programa de 6 millóns de euros para apoiar a empresas que exportan e axudas para a plantación de coníferas e frondosas, "en ningún caso eucaliptos", por 8 millóns de euros.
