O complexo da Cidade da Cultura de Santiago de Compostela albergará un centro de investigación universitario sobre o Camiño xacobeo no espazo inicialmente destinado ao Teatro da Ópera, un proxecto inacabado e abandonado, anunciou este luns o presidente da Xunta, Alberto Núñéz Feijóo.
O presidente galego fixo este anuncio tras a presidir o acto de constitución do Consorcio Interuniversitario do Sistema Universitario de Galicia, ao que acudiron os reitores das tres universidades galegas, e destacou que o centro de investigación terá un custo de 17 millóns de euros e aproveitará as "estruturas inacabadas" existentes do edificio da ópera.
A construción do novo espazo que albergará tamén, un "centro cultural europeo en paisaxes culturais" será financiada pola Xunta e polas tres universidades galegas, comentou Núñez Feijóo, quen afirmou que iso permitirá aforrar o custo da demolición das estruturas existentes do teatro da ópera, un dos edificios proxectados na Cidade da Cultura do que se construíron os alicerces e parte do esqueleto.
Na súa opinión, é unha decisión "responsable coas arcas públicas, respectuosa co investimento dos galegos e beneficiosa para as tres universidades" desta Comunidade autónoma.
"Non pretendemos que ese edificio chame a atención desde un punto de vista externo, senón desde o punto de vista dos contidos" que permitirá "habilitalo.
O novo edificio levará o nome do matemático galego Domingo Fontán (1788-1886), do que Feijóo destacou que "pasou vinte anos percorrendo Galicia a pé" para elaborar o "primeiro gran mapa" de Galicia.
"O edificio Fontán dará un novo sentido ao que se constrúe na cidade da Cultura desde o 'sentidiño' económico", comentou o presidente galego, e detallou que será un inmoble "sostible a nivel enerxético".
Feijóo, que anunciou en marzo de 2013 a decisión de paralizar de forma definitiva os dous edificios pendentes de construción da Cidade da Cultura, o do Teatro da Ópera e o do Centro de Arte Internacional, xustificou entón a decisión de recortar o proxecto por falta de orzamento, tras investir 287 millóns de euros nesas instalacións situadas no monte Gaiás.
Actualmente, a Cidade da Cultura, obra do arquitecto estadounidense Peter Eisenman encomendada polo antigo presidente da Xunta Manuel Fraga, consta de catro edificios construídos do total de seis do plan de deseño inicial.
Feijóo, que encomiou a contribución dos reitores, tanto dos saíntes das universidades de Santiago de Compostela e de Vigo, Juan Viaño e Salustiano Mato, respectivamente, como os novos desas institucións, Antonio López e Manuel Reigosa, e o da da Coruña, Julio Abalde, considerou que a decisión de constituír ese novo organismo "plasma que o minifundismo académico non cabe nas universidades galegas do século XXI".
Acompañado do conselleiro de Cultura, Educación e Orientación Universitaria, Román Rodríguez, o presidente galego destacou que a colaboración entre institucións académicas no novo Consorcio supón "absorber tres organismos previos e ampliar as súas competencias" para "canalizar a colaboración" mutua.
