A Xunta de Galicia impulsará a posta en marcha da primeira aceleradora galega do sector aeronáutico, como parte do polo tecnolóxico-industrial de Rozas, en Lugo, coa previsión de que se mobilicen 4,75 millóns de euros en apoio á innovación ata o final de 2021, e o obxectivo de impulsar 19 iniciativas que poderían xerar ao redor de 60 empregos.
A aceleradora conta co impulso da Xunta e o apoio da Fundación da Confederación de Empresarios de Lugo, o CTAG, Indra e Babcok. O seu obxectivo é facilitar a creación e o crecemento de compañías innovadoras no sector aeronáutico de Galicia, segundo expuxo durante a rolda de prensa do Consello da Xunta, o presidente autonómico, Alberto Núñez Feijóo.
O eixo da aceleradora é o polo tecnolóxico de Rozas, formado por tres alicerces. O primeiro, as infraestruturas que se están construíndo, como o Centro de Investigación Aeroportada, cun investimento de 10 millóns de euros.
O segundo alicerce é o programa conxunto de I+D, con 115 millóns -40 da Xunta e 75 das colaboradoras Indra e Babcock-. E o terceiro, as solucións tecnolóxicas baseadas en avións non tripulados, a través de compra pública innovadora, cun investimento de 24 millóns de euros.
Feijóo avanzou que en novembro deste ano porase en marcha a primeira edición da aceleradora, á que despois se unirán outras dúas máis. En total, espérase impulsar 19 iniciativas empresariais que poidan "xerar empregos moi cualificados que melloren o tecido do sector aeronáutico en Galicia", puntualizou. Estímase que se poderían xerar ao redor de 60 empregos.
Tras a convocatoria e a selección de proxectos, desenvolveranse dúas fases: a incubación e a aceleración, aínda que non teñen que ser necesariamente consecutivas.
Sobre a primeira delas, a fase de incubación, Feijóo apuntou que se dirixe a empresas en fase temperá, entre o nacemento da idea e a validación do modelo de negocio.
Respecto do financiamento, cada proxecto en fase de incubación contará cunha axuda de ata 100.000 euros da Xunta e o acceso a investimentos en capital de Indra de entre 50.000 e 500.000 euros.
A fase de aceleración, dirixida a empresas que xa existen e con certa facturación, prolongarase durante un ano. Neste período, as empresas poderán recibir os servizos e o apoio necesario polas súas características.
Optarán a un financiamento de Xesgalicia de entre 50.000 e 250.000 euros por proxecto e, por parte de Indra, poderán recibir investimentos en capital risco ou préstamos desde 50.000 euros por proxecto.
SERVIZOS DA ACELERADORA. Feijóo resaltou que a nova aceleradora prestará aos proxectos participantes diversos servizos, como espazos de traballo e coworking, infraestruturas de proba, acceso ao aeródromo, medios TIC e plataformas de xestión, consultorías técnica e de negocio, apoios na procura e negociación de financiamento ou acceso á bolsa de traballo de Rozas. A aceleradora estará aberta tamén a calquera outra institución, empresa ou entidade que desexe colaborar.
Na primeira edición, os colaboradores serán Delta Vigo, Centum, que desenvolve sensores e sistemas de comunicación aeronáuticos; Sixterna, especializada en sistemas de localización e cartografía; a Fundación Kiom, que presta servizos técnicos e de apoio á xestión; o Instituto Tecnolóxico de Matemática Industrial, o centro tecnolóxico Gradiant, e o Consorcio Aeronáutico Galego.
PAZO DE FEIRAS DE LUGO. Provisionalmente, a aceleradora situarase no Pazo de Feiras e Congresos de Lugo. O seu emprazamento final será, no entanto, o Centro Público de Innovación no Novo Barrio da Residencia. Para a execución deste espazo reservaranse nos orzamentos da Xunta de 2019 un total de 3 millóns de euros.
