O Goberno galego deu este xoves o visto e prace ao destino da última parte dos denominados fondos adicionais polo cumprimento do déficit coa previsión de dedicar 20 millóns de euros para mellorar as distintas actividades do sector primario.
Entre estas actuacións, o presidente da Xunta, Alberto Núñez Feijóo, destacou en conferencia de prensa unha partida dotada con 3 millóns de euros para os titulares das explotacións lácteas en dificultades e con necesidade de refinanciar créditos.
Ademais, anunciou a intención da Xunta de facer unha plantación "masiva" de castiñeiros próxima ao millón de unidades nunha superficie próxima ás mil hectáreas, coa intención de dedicar o seu produto, a castaña, á comercialización e diversificar deste xeito a actividade no rural.
As medidas anunciadas este xoves tamén prevén concluír as concentracións parcelarias e iniciar outras novas, de modo que se beneficiarán ata 30.000 propietarios e se ordenarán 44.000 hectáreas.
Así mesmo, a Xunta comprométese a dotar de novas infraestruturas viarias a estas novas concentracións, co obxectivo de facilitar a actividade.
Tamén haberá actuacións no sector da pesca, cunha partida de 3 millóns de euros dedicadas á mellora de pantaláns e da seguridade en distintos portos.
Con esta nova partida dedicada ao sector primario, a Xunta finaliza a repartición por áreas, explicada ao longo das últimas catro semanas, do autodenominado "superávit da responsabilidade".
En total destinará entre 155 e 157 millóns de euros a distintas actuacións relacionadas cos mozos, as familias, o emprego, a sanidade e a educación, entre outras.
A esta cantidade hai que sumar unha partida duns 25 millóns de euros, que será o custo de devolver aos empregados públicos o complemento específico da paga extra eliminado en 2013.
Esta medida terá que ser tramitada a través dun proxecto de lei que a Xunta remitirá ao Parlamento nas próximas semanas.
Deste xeito, a Xunta non esgota os "215-220 millóns" que recibirá pola súa xestión do déficit, senón que deixará unha parte para aumentar programas que funcionen e para imprevistos, indicou Núñez Feijóo.
A Xunta destina 20 millóns de euros do financiamento adicional do déficit para mellorar o sector agrario
Entre outros investimentos, o Executivo galego incentivará a plantación dun millón de castiñeiros nas catro provincias e dotará de axudas as explotacións lácteas en dificultades e con necesidade de refinanciar créditos
