A Xunta de Galicia resolveu a convocatoria que permitirá a 33 novos titulados no ámbito empresarial formarse como expertos en internacionalización, coa realización de formación práctica conxunta en Galicia durante 12 meses e a especialización en 16 destinos mundiais outro ano máis.
Así o informou a Consellería de Economía en relación ao programa impulsado a través do Igape e ao que se destinan 1,7 millóns de euros. Os 33 novos titulados que se beneficiarán son universitarios ou profesionais no ámbito vinculado ao mundo empresarial.
DESTINOS. Os destinos das bolsas serán Beijing, Cantón e Shanghái en China; Toronto e Otawa en Canadá; Miami e Nova York (EEUU); Sao Paulo (Brasil); Cidade de México (México); Bogotá (Colombia); Tokio (Xapón); Casabranca (Marrocos); Londres (Reino Unido), Seúl (Corea) e Dubái (EAU).
O programa está encamiñado á capacitación profesional de novos titulados para que consoliden o proceso de internacionalización de empresas, á vez que se favorece o seu acceso ao mercado laboral.
De forma paralela, impúlsase o desenvolvemento de proxectos de internacionalización das pequenas e medianas empresas galegas, nas que colaborarán os bolseiros, achegando os seus coñecementos e reforzando a súa formación práctica.
A programación das bolsas abarca o estudo dos mercados estranxeiros, a análise de oportunidades e debilidades de sectores estratéxicos galegos en relación coa súa internalización e a avaliación de formas de introdución de empresas en mercados estranxeiros.
O programa enmárcase na Estratexia de internacionalización da empresa galega 2020 da Xunta.
