A Xunta de Galicia aposta por aumentar a produción das denominacións de orixe de queixo galegas e por mellorar o seu posicionamento no marco da estratexia do sector lácteo. Así o destacou o conselleiro do Medio Rural, José González, na clausura da xornada técnica Queixos galegos con DOP - Irmáns de leite, celebrada en Palas de Rei (Lugo), e na que estivo acompañado polo delegado territorial da Xunta na provincia, Javier Arias, polo director xeral de Gandaría, José Balseiros; así como polo titular da Axencia Galega da Calidade Alimentaria (Agacal), José Luís Cabarcos.
O acto, dirixido a un grupo de queseros tradicionais do concello lucense de Palas de Rei, busca abordar a experiencia produtiva de cada un deles e a importancia das marcas de calidade diferenciadas como potenciadoras da distribución destes produtos. Así, na xornada, púidose coñecer de primeira man o bo facer dos representantes das DOP Queixo Tetilla, Cebreiro, Arzúa Ulloa e San Simón da Costa premiados cos ouros na Cata dos Queixos de Galicia 2020.
Ante todos eles, o conselleiro puxo en valor cada unha das formas tradicionais que adquire un produto da calidade extraordinaria como é o queixo, así como a relevancia destas catro denominacións de orixe no marco do sector lácteo galego. Nesa liña, recordou que Galicia destaca como unha das dez principais rexións leiteiras de Europa, producindo o 40% do leite de toda España e abarcando máis da metade das explotacións lácteas do total nacional.
Deste xeito, co obxectivo de consolidar aínda máis este sector crave para a economía galega, José González apostou por continuar impulsando a transformación do leite en produtos de alto valor engadido que xeren riqueza en Galicia. Segundo indicou, é o caso dos queixos con selo de calidade polo que é necesario aumentar o peso destes produtos na transformación industrial, avogando por optimizar os procesos de elaboración e pondo en valor as súas características diferenciadoras relacionadas co territorio e co seu proceso de elaboración.
Ademais da estratexia de dinamización do sector lácteo, o conselleiro tamén se referiu á futura lei de recuperación da terra agraria de Galicia -actualmente en trámite parlamentario- e aos instrumentos de mobilización que permitirán proporcionar máis base territorial aos agricultores e gandeiros que así o demandan.
