A Dirección Xeral de Patrimonio da Xunta de Galicia abriu un expediente de dilixencias previas para "aclarar" o sucedido a unhas mámoas no municipio do Irixo danadas por mor dunhas obras en monte comunal.
Segundo informaron fontes da Consellería de Cultura a Europa Press, un técnico da Dirección Xeral de Patrimonio Cultural da Xefatura provincial, a instancias do Seprona da Comandancia da Garda Civil de Ourense "desprazouse ao lugar e analizou o ocorrido" nun espazo de monte comunal do Irixo, "onde se localiza a afección ás mámoas".
Patrimonio asegura que procedeu "de modo inmediato" a abrir "un expediente de dilixencias previas para aclarar o sucedido" e solicitouse "información tanto á comunidade de montes como ao Concello".
DEVASA. Os danos rexistrados en tumbas neolíticas no municipio do Irixo, catalogadas como ben cultural, producíronse ao facer cunha máquina devasa e camiños en monte comunal, segundo confirmou a Europa Press o alcalde da localidade, Manuel Penedo, quen recordou que "o ano pasado veciños do Quinteiro solicitaron un buldócer para facer camiños e devasa".
