Unha parella viguesa recibiu a negativa dos xulgados da localidade a casalos. O motivo? A vestimenta de ambos. Él ía co traxe do pirata Jack Sparrow, e ela co traxe tradicional galego. Un vestiario que significa moito para ambos pero que impediu que a voda se celebrase.
Berto e María atopábanse felices, a 15 minutos de darse o si, quero. Todo parecía encamiñado a que ambos vivisen o seu gran día, pero unha funcionaria avisounos de que non ía ser posible. A xuíza, contan, negouse a recibilos.
"Nós queriamos casar así porque ten un sentido e un simbolismo sentimental. Non nos parece que estiveramos ofendendo a ninguén", conta María en declaracións á Televisión de Galicia. Berto, de feito, visitou o campo de refuxiados de Idomeni con esa vestimenta, e os seus propios fillos chámano Jack Sparrow.
Esta negativa, con todo, non freou os seus desexos de casar así. Este pasado domingo regresaron aos xulgados vigueses para denunciar os feitos e o trato recibido, e a súa intención é iniciar novamente os trámites para casar cun vestiario tan importante para a parella e o seu proxecto solidario.
