Xulgado abre dilixencias contra delegada de DomusVi e dous cargos da Xunta

Os querellados son investigados polos presuntos delitos de homicidio ou lesións por imprudencia profesional ou de abandono de discapacitados
DomusVi Aldán (Cangas). ADP.
photo_camera DomusVi Aldán (Cangas). ADP.
O Xulgado de Primeira Instancia e Instrución número 3 de Cangas acordou incoar un procedemento de dilixencias previas contra a conselleira delegada de DomusVi España, Josefina Fernández, e a directora do xeriátrico DomusVi Aldán, así como contra dous altos cargos da Xunta. Estes son María Berta Besada, xefa dos servizos de Inspección de Maiores e Discapacitados, e Idelfonso de la Campa, director xeral de Maiores e Persoas con Discapacidade. 

A todos eles investígaselles polos presuntos delitos de homicidio ou lesións por imprudencia profesional ou de abandono de discapacitados, segundo consta no auto ao que tivo acceso Efe. 

O xuíz admitiu a querela presentada polos familiares de dúas usuarias de DomusVi Aldán (Cangas), unha das tres residencias intervidas pola Xunta debido ás altas cifras de contaxiados por coronavirus, que se acabaron traducindo nunha trintena de falecidos só neste centro. 

Nesta primeira fase de investigación, o maxistrado cita a declarar ás querellantes, non aos querellados; require a Geriatros SA acceso ao historial médico destas dúas residentes, unha das cales faleceu no hospital, e encarga un informe forense sobre o diagnóstico e a asistencia médica de ambas. 

Nese informe débese establecer se o tratamento médico que recibiron na residencia foi adecuado e se existiu, tendo en conta o excepcional da situación pola pandemia do coronavirus, "algunha acción ou omisión constitutiva de imprudencia profesional" que provocase o contaxio dunha e a morte doutra. 

O xuíz David Pérez Laya aclara no seu auto que non se trata de investigar DomusVi ou a residencia de maiores de Cangas, nin sequera todas e cada unha das actuacións do persoal" desde que ingresaron estas dúas usuarias, pois "gran parte" dos feitos relatados na querela non son constitutivos de infracción penal. 

Do que se trata, abunda, é de investigar inicialmente se existiron accións ou omisións que provoquen o falecemento dunha das residentes e do contaxio por COVID-19 da outra, "tendo en conta as especiais circunstancias" sanitarias pola pandemia. 

Por iso acorda, "polo menos neste momento inicial", tomarlle declaración ás querellantes antes de practicar máis dilixencias, incluso antes de ouvir en declaración aos querellados e de practicar unha imputación formal de feitos. 

Cre o xuíz que "non se cumpren os presupostos necesarios para acordar as demais dilixencias neste momento procesual, sen prexuízo da súa práctica posterior". 

Parte dos querellantes acusan aos responsables da residencia DomusVi Cangas de falta de coidado e auxilio adecuados á súa nai, das lesións sufridas derivadas do diagnóstico positivo por Covid-19 e daquelas polas numerosas caídas que tivo e que non se trataron debidamente. 

As fillas da outra residente denuncian que a súa nai ingresou no hospital Álvaro Cunqueiro cun cadro de deshidratación severa, e insuficiencia respiratoria e renal, e faleceu once días máis tarde. 

Sosteñen que a súa morte se derivou da mala xestión da crise por parte das querelladas, que esperaron a que a residente presentase un cadro de tal gravidade que todo intento por preservar a súa vida por parte do persoal do hospital fose en balde. 

O xuíz descarta a cualificación dos feitos, pretendida polos querellantes, como un delito de abandono dunha persoa con discapacidade e de omisión do deber do socorro, e cre que tampouco constitúen unha denegación de asistencia. 

A Federación de asociacións de familiares e usuarios de residencias (REDE) advirte de que esta é a primeira das "decenas" de querelas que tramitará o despacho de avogados Pérez-Lema

Polo momento rexistrou outra querela nos xulgados da Coruña por parte dos familiares dunha usuaria falecida do xeriátrico DomusVi Matogrande

De forma paralela, o mesmo despacho, en colaboración con REDE, tramita denuncias pola vía civil contra DomusVi España por fraude de contrato, cláusulas abusivas e cobros impropios. 

Comentarios