O Xulgado de Violencia sobre a Muller da Coruña acordou este venres prisión provisional comunicada e sen fianza para o home detido por matar á súa muller este mércores no seu domicilio da céntrica rúa da Estrella, na Coruña. Fontes xudiciais informaron de que ao presunto autor da morte investígaselle por un delito de homicidio.
O xuíz que se fixo cargo da instrución desprazouse este venres ao Complexo Hospitalario Universitario da Coruña (Chuac), onde permanece o detido. Segundo informaron fontes do Tribunal Superior de Xustiza de Galicia, o marido, que foi quen alertou á Policía de que matara á súa muller, accedeu a prestar declaración.
Desde a súa detención o pasado mércores, o home permanecía ingresado no hospital para realizarlle distintas probas médicas, dixeron as mesmas fontes. Aínda que durante as primeiras horas posteriores ao crime baralláronse varias posibilidades diferentes a un machista, finalmente confirmouse que a morte era un acto máis de violencia de xénero.
ANÁLISE DE TECIDOS. O delegado do Goberno en Galicia, Javier Losada, en declaracións aos medios de comunicación este venres, instou a esperar polo "estudo anatomopatolóxico" (análise das características dunha mostra de tecido, que indican que tipo de enfermidade se padece e, no caso de tumores, se estes son benignos ou malignos).
Así, búscase corroborar cal era a situación da vítima, polo que Losada convidou a esperar antes de facer calquera "elucubración" sobre a premisa de se foi a enfermidade e evitarlle á muller o sufrimento o que puido motivar como actuou o marido. Despois da súa participación no minuto de silencio que se convocou en sinal de repulsa ante a Delegación do Goberno, Losada informou de que o xulgado "está a facer todas as investigacións forenses e policiais para buscar cal foi a causa última e todos os condicionamentos que hai".
A muller, María Judite Martins Alves, tiña 57 anos, padecía unha enfermidade grave e foi presuntamente degolada polo seu marido, de 54 anos, cunha arma branca. Foi el mesmo quen chamou á Policía para contar o ocorrido, esperou no domicilio aos axentes e non opuxo resistencia á súa detención.
Hoxe en toda Galicia convocáronse diferentes actos, tanto por parte das institucións como de organizacións feministas, para mostrar a condena aos crimes machistas.
O delegado do Goberno fixo un chamamento á cidadanía a que exprese na rúa a súa "repulsa" por este tipo de actos. "Oxalá houbese moitas máis concentracións, oxalá hoxe en todos os postos de traballo saíse a xente no minuto que puidese para dicir 'xa abonda'", declarou.
