Voluntarios de Protección Civil premian a Villanueva e á Brilat de Pontevedra

A Asociación Nacional de Agrupacións e Asociacións de Voluntarios de Protección Civil entregou este sábado a Cruz de Servizos Distinguidos na súa categoría de ouro ao delegado do Goberno en Galicia, Santiago Villanueva.

Nun acto celebrado na Academia Galega de Seguridade Pública na Estrada, Villanueva foi recoñecido polo seu traballo de colaboración tanto coa ANAV como por todas as Agrupacións de Voluntarios de Protección Civil de Galicia, establecendo lazos de unión e cooperación dentro e fóra de Galicia, así como pola promoción das actividades e finalidade da Protección Civil e o seu voluntariado na comunidade autónoma.

No acto premiouse tamén o labor de 29 persoas -14 delas a título póstumo- e 21 agrupacións locais de toda Galicia, así como da Brilat, con base en Figueirido, en Pontevedra, e do rei emérito Juan Carlos de Borbón como recoñecemento ao seu traballo de apoio tras o afundimento do Prestige.

Durante a súa intervención, o delegado do Goberno, que falou en nome de todos os que foron galardoados nesta edición, destacou que os voluntarios de Protección Civil colaboran "con valentía, altruísmo e xenerosidade". "E, como vimos, arriscando e perdendo a vida, en ocasións, polo ben común. En definitiva, representando o mellor de nós como sociedade moderna e organizada. E levando ao extremo a afirmación de que a seguridade nos concerne a todos", indicou.

O acto estivo presidido polo presidente de ANAV de Protección Civil de España, Arturo Fuente Pedrejón e asistiron, entre outros, o alcalde da Estrada, José Carlos López; o vicepresidente da Xunta de Galicia, Alfonso Rueda; o director de Emerxencias e Interior da Xunta de Galicia, Luis Menor.