O centro penal A Lama foi escenario este martes dunha violenta agresión por parte dun recluso a tres funcionarios, que tiveron que ser derivados a un centro hospitalario tras recibir unha primeira atención médica na enfermería da prisión. Os sindicatos con representación no centro Acaip-UXT, CC OO, CSI-CSIF, CIG e ATP denuncian nun comunicado o "brutal" ataque, que se produciu cando, logo da cea, o interno regresaba do módulo de Enfermería e comezou a proferir ameazas contra outro preso que o acompañaba no mesmo traxecto.
Os traballadores, ao contemplar a escena, decidiron retelo e proceder a un cacheo preventivo. O recluso negouse e, de forma sorpresiva e con gran violencia, arremeteu contra os funcionarios. A un propinoulle dúas fortes puñadas en fronte e nariz, a outro golpeouno na tempa e no lateral da cabeza, producíndolle un corte na orella, e a un terceiro pegoulle na fronte, causándolles "lesións de importancia".
Con axuda de dous xefes de servizo e outros compañeiros que se acudiron no lugar dos feitos lograron reducir ao interno e trasladalo ao departamento de illamento "con gran dificultade", segundo o relato dos sindicatos, que denuncian no seu escrito que a situación é "insostible".
"A falta de persoal (máis de 70 postos vacantes sen cubrir), en envellecemento do persoal cunha media de idade que supera os 52 anos, a falta de nomeamento como axentes de autoridade (a pesar das reiteradas promesas electorais) a falta de medios e formación adecuada son detonantes que pon en risco día si día tamén a saúde dos traballadores do centro", argumentan as centrais.
147 AGRESIÓNS GRAVES. Segundo os datos facilitados pola Secretaría Xeral de Institucións Penais ás organizacións sindicais, en nbsp;os&últimos anos producíronse 147 agresións graves na prisión da Lama, unha cifra que catalogan de "escandalosa", pero coa que discrepan, xa que non se contemplan outros ataques menos graves e leves que, aseguran, "prodúcense a diario".
Os sindicatos convocaron o venres día 4 de xuño ás 11 da mañá unha concentración no centro penal da Lama en repulsa por estes feitos, en apoio aos compañeiros agredidos e en protesta "pola falta de solucións achegadas polos xestores da Institución Penal a estas agresións".
